23. Poem #rbu_ក្រមុំមានលក្ខណ៍

១. ក្រមុំមានលក្ខណ៍
ប្រុសៗព្រើតភ្ញាក់
រលាក់សំណើច
រលាស់នេត្រា
មៀងភក្ត្រាសើច
ក្នុងចិត្តនឹកស្ងើច
នាងកែវមនោរាហ៍។

២. មើលទៅខាងនោះ
ភក្ត្រស្រស់សស្គុស
គឺនាងចន្ទ្រា
អើតភក្ត្រក្រឡង់
ដូចចង់សន្ទនា
លើកហត្ថវន្ទា
ចន្ទ្រាមាសអើយ។

៣. ម្ដេចក៏នៅស្ងៀម
មៀងមុខអឹមអៀម
ឬនាងតោះតើយ
ឲ្យផ្កាយកំព្រា
គ្មានគ្នាកៀកកើយ
ឱ ចន្ទ្រាអើយ
ម្ដេចឡើយដាច់ចិត្ត។

៤. ឯណេះ មណី
មិចភ្នែកមមី
ដូចលែងអាណិត
មេខលា មៀង
ដៀងភ្នែកបញ្ឆិត
បញ្ឆោតដូចឥត
បង់ចិត្តមេត្តា។

៥. មើលនាង Joly
សក្តិសមទេពី
ទ្រង់គ្រឿងពស្ត្រា
អម្ពរពេជ្រព័ទ្ធ
កែវរតន៍អប្សរា
ដូចទេពធីតា
យាងចាកឋានសួគ៌។

រក្សាសិទ្ធិ copyright rbu_spp Friday July 10, 2015, RE: Sao Puthpong

សេចក្ដីអធិប្បាយ comments ៖

Puthpong Sao:
អរគុណនាងភក្ដី ចំពោះ comment ជារូបភាព ទើបខ្ញុំសរសេរថែមល្បះទី៥។

Angelina Joly in Khmer Apsara costume.

ជី មេត្តា:
ស្នាដៃបវរ
កេរកាព្យស្មេរល្អ
អភិរក្សស្នា
សិល្បៈកាព្យខ្មែរ
កេរពីដូនតា
ស្ទួយជាតិខេមរា
អក្សរជាតិខ្លួន។

Puthpong Sao:
អរគុណជូូនតប
សូមបានប្រកប
សុខភាពមាំមួន
មង្គលសិរី
យសធំកំភួន
ទ្រព្យចូលផ្ទួនៗ
សមសួនតាមសក្តិ។

ជី មេត្តា:
សាធុប្រុសបង
ពរសមកន្លង
ប្អូនអរគុណជាក់
បងក៏ដូចគ្នា
ចម្រើនកើនថ្នាក់
មានយសមានសក្តិ
កបដោយគុណធម៌។

ជា សំអាត ផ្កាយខ្មៅ ផ្កាយខ្មៅ:
បងប៉ិនសសើរ
  សមសព្វដំណើរ
     រូបឆោមកាយា
        ឲ្យស្រីលុះលង់
           បែរបាក់ចិន្តា
              ងាកងប់ស្នេហា
                 ចារចងចិត្តស្ម័គ្រ។

Puthpong Sao
លោក សំអាត

ទាំងនេះក៏ព្រោះ ខ្ញុំនៅចាំ
កំពូលវណ្ណកម្ម ដូនតាខ្មែរ
អក្សរសិល្ប៍ខ្ពស់ ជាហូរហែ
រឿងរាមកេរ្តិ៍ខ្មែរ ទុំទាវ ក្ដី។

ទាំងរឿង សព្វសិទ្ធ និងផ្សេងៗ
សព្វទាំងរឿងព្រេង ទាំង កាកី
មរណមាតា ហង្សយន្តក្ដី
អួតសម្រស់ស្រី ពាក្យល្អៗ។