266. Poem #rbu_646_វីឡាអ្នកស្រែ

វីឡាស្រុកស្រែ រាស្ត្រខ្មែររស់នៅ គន់មើលយូរទៅ ភ្នែករេរំពៃ សម្បត្តិស្រុកខ្មែរ សំបូរឈើព្រៃ ចុះតើហេតុអ្វី រាស្ត្រជ្រកខ្ទមស្លឹក? វីឡាអ្នកស្រែ ស្រុកខ្មែរស្លឹកខ្ទម កម្សត់ទាំងព្រម រស់នៅប្រញឹក ប្រជែងនឹងក្រ លំបាកស៊ាំថ្នឹក ដូចរស់ក្នុងសឹក(១) រំលស់គម្លាន។ ឈើព្រៃកាប់វាល ត្រងោលទាំងភ្នំ ពួកឈ្មួញអ្នកធំ រំលំទន្ទ្រាន លក់ឈើកើបលុយ ធ្វើសេដ្ឋីមាន រាស្ត្រក្ររស់គ្មាន ផ្ទះឈើជ្រកនៅ។ ស្រុកសំបូរឈើ សម្បត្តិធម្មជាតិ ធនធានពេញព្រាត ពិនិត្យជាក់ទៅ ម្ដេចមានតែឈ្មួញ អ្នកធំញាតិផៅ អភិវឌ្ឍន៍ស្អីទៅ ទុក្ខរាស្ត្រឥតល្ហែ។ អាណិតតែរាស្ត្រ តើរស់យ៉ាងណា ចង់បានវីឡា ថ្មនឹងគេដែរ ឬត្រឹមផ្ទះឈើ ជារាស្ត្រអ្នកស្រែ អភព្វអ្វីខ្មែរ រាស្ត្រក្រហួសថ្លែង៕ សឹក (១) = សង្គ្រាម © rbu_spp 8:25 pm, Nov 14, 2014 Puthpong Sao No automatic alt text available. 9 Comments